पुणे : इंडिगो एअरलाइन्स कंपनीच्या विमानात बाॅम्ब ठेवल्याचा संदेश समाज माध्यमातून प्रसारित करण्यात आल्याचा प्रकार उघडकीस आला आहे. अफवा पसरविल्याप्रकरणी विमानतळ पोलिसांकडून समाजमाध्यमातील खातेधारकाविरुद्ध गुन्हा दाखल करण्यात आला आहे.

याबाबत हिमांशू योगेश अगरवाल (वय २८) यांनी विमानतळ पोलीस ठाण्यात फिर्याद दिली आहे. याप्रकरणी ॲडमलान्झा ९७५१४ या नावाने समाज माध्यमात खाते वापरणाऱ्याविरुद्ध गुन्हा दाखल करण्यात आला आहे. २ नोव्हेंबर रोजी सायंकाळी पावणेसहाच्या सुमारास इंडिगो एअरलाइन्स कंपनीच्या विविध विमानात बाॅम्ब ठेवण्यात आला आहे, असा संदेश पाठविण्यात आला. संबंधित संदेश आल्यानंतर त्वरीत या घटनेची माहिती लोहगाव विमानतळ प्रशासन, तसेच पोलिसांना कळविण्यात आली. बॉम्ब शोधक नाशक पथकाने घटनास्थळी धाव घेतली. विमानतळ, तसेच विमनाची तपासणी करण्यात आली. तेव्हा बाॅम्बसदृश वस्तू आढळून आली नाही. अफवा परसविणारा संदेश प्रसारित करण्यात आल्यानंतर विमान प्रवाशांना विमानतळावर ताटकळत थांबावे लागले. तपासणी झाल्यानंतर विमानाने उड्डाण केले. गेल्या काही दिवसांपासून विमानात बाॅम्ब ठेवण्यात आल्याचे संदेश पाठविण्यात येत आहेत. अशा प्रकारच्या संदेशामुळे प्रवाशांसह आणि विमान कंपन्यांना मनस्तापाला सामोरे जावे लागत आहे.